الان – ترحيل محمد الشيبى.. مفاجآت جديدة في قضة حسين الشحات – البوكس نيوز

حكم سنة مع إيقاف التنفيذ لمدة 3 سنين، وحرمان من عضوية أي نشاط رياضي لمدة 5 سنين وتعويض مدني 100 ألف جنيه.. ده القرار اللي طلع ضد حسين الشحات لاعب الأهلي في أزمته مع محمد الشيبي لاعب بيراميدز.. لكن المفاجأة أن كل ده مش هيحصل حاجة.. والخطيب هيظهر العين الحمراء للكل.

وكمان الأهلي بيجهز نفسه عشان يدافع عن نجمه.. أيه اللي هيحصل؟.. وإزي الأهلي هيمنع تنفيذ الحكم؟.. ومين اللي هيحل الأزمة؟.. وأيه الطلب الغريب اللي عايزه ممدوح عيد من الكابتن محمود الخطيب؟.. ده اللي هنعرفه مع بعض في “عرب 22”.

يوم 30 مايو أسدل الستار على أزمة مستمرة بقالها شهور ومش عايزة تخلص.. هي تعدي حسين الشحات على المغربي محمد الشيبي، لكن الحكم اللي طلع النهاردة خوف مشجعين النادي الأهلي اللي شايفين أن مش من حق أي لاعب يشتكي في القضاء المدني.

القرار اللي طلع ده مش نهائي وحسين الشحات هيطعن عليه خلال 10 أيام وفقا لأحكام القانون، والحكم مشمول بالايقاف وعشان كدا الشحات مش لازم يحضر الجلسات، وكمان اللاعب هيستمر في الملاعب ومفيش أي كلام عن إيقافه يعني يقدر يشارك مع الأهلي في الماتشات عادي.

لكن القرار يخص الترشح للمجالس الإدارية فقط.. يعني لما يعتزل مش دلوقتي وكمان لمدة 5 سنين مش طول العمر.. ده غير أنه مش قرار نهائي ومن حقه الاستئناف وغالبا هيصدر حكم بعدم الاختصاص ويتلغي في الدرجات التانية.

المسئولين في نادي بيراميدز مش عاجبهم القرار اللي طلع وكانوا عايزه يبقي مع التنفيذ.. بس مصادر في النادي اتكلمت على الحل الودي للقضية وقالت: “حسين الشحات عارف كويس محمد الشيبي عايز أيه عشان يخلصوا الأمر ودي.. لكن بيكابر.. اللي اتعرض ليه الشيبي مينفعش يخلص في عزومة غداء.. الشحات عارف اللي منتظره من الشيبي بعد تصرفه غير الأخلاقي.. وفيه استئناف يوم السبت الجاي .. والكرة دلوقتي في ملعب لاعب الأهلي لحل الأزمة بشكل ودي”.

المسئولين في الأهلي معلقوش على القرار لكن الكابتن محمود الخطيب رئيس القلعة الحمراء تواصل مع المستشار القانوني للنادي عشان يقدم استئناف على الحكم.. وقرر الخطيب يعمل مشاورات عاجلة مع أعضاء مجلس الإدارة عشان يشوفوا هيصعدوا القضية في الاتحاد الدولي لكرة القدم “فيفا” إزي.

الخطيب شايف إن محمد الشيبي لاعب بيراميدز خالف لوائح النظام الأساسي لاتحاد الكرة والفيفا ولجأ للمحكمة المدنية اللي مش مختصة بنظر خلافات ونزاعات الملاعب.

حسين الشحات أول ما عرف القرار نشر صورة ليه هو وولاد في البحر وكأنه مش هامه أي حاجة.. وخلي المحامي يستأنف على القرار قدام محكمة جنح مستأنف مدينة نصر.

مصدر في النادي الأهلي قال إن ممدوح عيد الرئيس التنفيذي لنادي بيراميدز عايز الخطيب يعتذر عن اللي حصل من حسين الشحات لكن بيبو رفض وقال الأزمة مع اللاعب مش النادي.. وتدخل الكابتن هاني أبو ريدة رئيس اتحاد الكرة السابق لكن موصلش لحل.

وبعدها الخطيب رفض الحلول الودية وقال هنمشي قانوني وأنا بعرف أجيب حق الأهلي ولعيبته كويس..، لكن لحد دلوقتي مفيش حل.. والحل الوحيد للمشكلة هو اعتذار حسين الشحات للشيبي عشان نقفل على الأزمة دي.

شيكابالا كابتن الزمالك اتكلم عن الأزمة وقال: “الموضوع هيتحل.. حسين قال أنا غلطت.. والشيبي لو يقبل الاعتذار مني أروحله.. وبعد الموقف ده أنا بعتله قلتله أنا بعتذرلك نيابة عن لعيبة الكرة كلهم في مصر».