الان – خناقة نادر شوقي ومحامي أحمد رفعت – البوكس نيوز

ادعو لأحمد رفعت بالرحمة والمغفرة.. وربنا يصبر أمه.. قضية نجم الكرة المصرية الراحل أحمد رفعت عاملة زي كرة التلج كل يوم تتحرك وتكبر لحد ما تاخد الكل في وشها.. والمؤشرات بدأت تظهر خصوصا بعد رحيل وليد دعبس عن نادي مودرن فيوتشر.. وبقي فيه كلام عن تصفية أحد الأندية.. واختفاء مسئولين من الساحة.

مين اللي هيتخفي؟.. وأيه حكاية النادي اللي هيتصفى؟.. وأيه سبب الخناقة بين نادر شوقي ومحمد رشوان اللي بيقول أنه محامي أحمد رفعت؟.. ومين البديل اللي هيكون في اتحاد الكرة؟.. ده اللي هنعرفه مع بعض في “قشة لفة بلس”.

يوم التلات 9 يوليو 2024 فوجئ الوسط الرياضي بإعلان الدكتور وليد دعبس استقالته من نادي مودرن بعد المداخلة الهاتفية اللي عملها مع الإعلامي هاني حتحوت واللي قال بعدها: ” بعض الناس بتقول أن فيه ضغوطات شديدة كانت على الدكتور وليد بعد التصريحات.. لكن الخبر الأهم هو رحيله.. ومش شايف أن التصريحات دي هي السبب.. وإعلان انسحابه من المشهد الرياضي مصطلح له دلالات كثيرة”.

“الناس خايفة إن الموضوع يتنسى يوم بعد يوم، لكن تصريحات وزارة الشباب والرياضة أكدت خروج نتائج التصريحات خلال أسبوع لوسائل الإعلام والرأي العام”.

وكمان الناقد الرياضى إسلام صادق اتكلم عن تداعيات وفاة أحمد رفعت وكتب بوست على فيسبوك وقال فيه: “تغييرات واسعة في إدارة الكرة المصرية وإختفاء شخصيات بارزه وعودة مسئولين سابقين خلال المرحلة المقبلة.. وإتجاه لتصفية أحد الأندية بنهاية الموسم”.

والجماهير على مواقع التواصل خمنت أنه هيتم تصفية نادي فيوتشر صاحب الأزمة.. واترددت أنباء عن اختفاء شخصيات من المشهد.

لكن النائب أحمد دياب رئيس نادي فيوتشر السابق ورئيس رابطة الأندية المصرية المحترفة، حضر العزاء اللي عمله النادي مع نجوم الرياضة ووزير الرياضة.. وده اللي أغضب الجماهير اللي هاجمت رئيس رابطة الأندية واعتبرته هو المسئول عن المشكلة اللي وقع فيها أحمد رفعت.. وقالوا إزي يروح العزاء وهو السبب في اللي حصل ليه.

والصحفيين والنقاد الرياضيين قالوا إن دي الأيام الأخيرة لأحمد دياب في الرياضة المصرية.. خصوصا بعد استقالة وليد دعبس.. واتقال إن المسئولين عنفوا وليد دعبس بعد كلامه أن سبب فسخ التعاقد بين نادي الوحدة الإماراتي وأحمد رفعت: “محدش هيقدر يقوله لا أنا ولا الإدارة السابقة لنادي فيوتشر”: “أنت ورطنا ومكنش ينفع تتكلم وتقول اللي قولته ده”.

وفيه مصادر قالت إن دور أحمد دياب في الكرة المصرية شبه انتهى وفي أحسن الأحوال هيكمل الموسم الحالي وفيه تواصل حصل معاه من أطراف كتيرة على صلة بالأمر.. واتكلموا معاه بلغة حادة وبلغوه أنه بقي مغضوب عليه.

وفكرة استفزاز الرأي العام مرة تاني وتجديد الثقة السنة الجاية فيه كرئيس لرابطة الأندية… أو انتخابه في رئاسة اتحاد الكرة اللي كان بيجهز ليه مش هيبقي موجود.. وغالبا هيستدعوا ناس قديمة للمشهد الرياضي من جديد زي الكابتن هاني أبو ريدة رئيس الاتحاد السابق.

وبعيد عن تورط المسئولين.. حصلت خناقة بين نادر شوقي وكيل أحمد رفعت ومحمد رشوان محامي اللاعب.. لما جمعتهم مداخلة في برنامج “+90” على قناة “النهار”.. نادر شوقي وجه سؤال لـ محمد رشوان قاله: “حضرتك عارف إن النهارده كان عزاء أحمد رفعت؟”.

رد محمد رشوان وقاله: “عارف كويس يافندم ليرد شوقي: حضرتك شرفتنا النهارده؟.. وبعدها انفعل رشوان وقاله: “حضرتك جاوب على السؤال لأن نادي موردن سبورت أعلن أن العزاء مقتصر على المنزل بسبب القلق اللى حصل على السوشيال ميديا من حضرتك وناس تانية لأنكم حولتوا الموضوع لحرب”.

وكمل رشوان: “أرفض توجيه الموضوع اللى احنا بنتكلم فيه.. انت بتودي الرأي العام فين.. خليك في أمرك أنت كنت مع اللاعب في الإمارات”…

ورد عليه نادر شوقي: “أنا مش قاعد على قهوة ولا في الشارع.. وقفل الموبايل في وشه.. وعبدالظاهر السقا ملوش علاقة بالمشكلة.. ومحمد رشوان ده محامي فيوتشر اللي عينه النادي عشان القضية يعني مش محامي أسرة اللاعب.