الان – 3 شروط للبقاء وسر حضن الخطيب.. محمد الشناوي يثير الغضب في الأهلي – البوكس نيوز

محمد الشناوي طلع في تصريحات تلفزيونية وهاجم الصحافة الإعلام عشان بيقولوا عليه كلام هو شايفه أنه غلط.. بس الأيام كشف عكس الكلام ده.. ومصطفى شوبير ومعاه مارسيل كولر مدرب الأهلي حكوا عن الأزمة اللي كانت موجودة وليه زعلان وغضبان من اللي حصل.. لكن المفاجأة أن الشناوي حط 3 شروط عشان يجدد عقده في الأهلي.. أيه هي؟.. وأيه الطلب اللي أثار الغضب في الأهلي؟.. وأيه حكاية عرض الزمالك المغري؟.. ده اللي هنعرفه مع بعض في “قشة لفة بلس”.

محمد الشناوي زعلان من إدارة الأهلي بسبب اللي حصل معاه.. خاصة بعد ما لقي مؤشرات أنه هيقعد دكة لمصطفى شوبير.. وسبب الأزمة هو أنه كان فيه اتفاق بين الأهلي والشناوي على تعديل عقده بعد التجديد لحسين الشحات اللي بقي أعلى واحد بياخد فلوس في الفريق.

وبعدها الأهلي اتعاقد مع إمام عاشور وبقي رقم 1 و2 في الأهلي هما حسين الشحات وإمام عاشور.. ومحصلش ترضية لمحمد الشناوي.. اللي شايف أنه مينفعش يبقي أقل من الشحات وإمام.. وهو كابتن الفريق ودوره حاسم في البطولات.. الشناوي عقده هيخلص في السنة الجاية وهيكون ليه حق التوقيع لأي فريق شهر يناير الجاي.

والمفاجأة أن مسئولين نادي الزمالك بدأوا في جس نبض محمد الشناوي عن طريق وسطاء.. عشان ييجي يلعب مع الفريق بدل محمد عواد ومحمد صبحي.. إدارة الزمالك عايزينه عشان المدرب البرتغالي جوزيه جوميز شايف إن الاتنين الحراس قصار القامة وعندهم مشاكل في الكرات العرضية والعالية ومش بيعرفوا يمسكوها.. ووجود الشناوي هيكون مهم في الفريق.

محمد الشناوي عنده رغبة في التجديد مع الأهلي بس شروطه هو تعديل العقد ويلعب أساسي.. ودي حاجة تعتبر في علم الغيب وبقرار من المدرب السويسري مارسيل كولر.

المسئولين في الأهلي قرروا أنهم هيقعدوا مع الشناوي ويجددوا معاه العقد.. ولو جاله عقد من الدوري السعودي.. الأهلي مش هيمانع في رحيله للسعودية ويستفيد من الفلوس.. وبالتالي الرغبة عنده اللعب في الأهلي أو الاحتراف لأنه خد وعدين من الكابتن محمود الخطيب في وقت ما جاله عرضين واحد من فريق النصر السعودي والتاني من ويجان الإنجليزي.

والخطيب وعده إنه هيعدل عقده لكن ده محصلش.. وطلب ترضية في باقي عقده عشان مرضيش يبيع النادي في وقت مهم.. وكمل مع الفريق.. لكن الاعتراض عنده أنه بقي رقم 3 في الفريق بعد إمام عاشور وحسين الشحات.

وفي نهائي دوري أبطال أفريقيا وقت التتويج الكابتن الخطيب حضن الشناوي والناس فسرت ده أنه آخر موسم ليه مع الأهلي.

أحمد حسام ميدو نجم الزمالك السابق اتكلم على مستقبل الشناوي وقال “من الأفضل ليه يسافر السعودية عشان يحترف ويستفيد ماديًا، خاصة بعد تألق مصطفى شوبير.. والشناوي هو كمان هيستفيد ويدخل تجربة احترافية جديدة.. الجمهور حابب وجود الشناوي مع الفريق، وبتمنى النادي الأهلي يعمل واجب وطني ويسيب محمد الشناوي للزمالك في الموسم الجاي”.

الشناوي انضم هو ومصطفى شوبير لقائمة منتخب مصر ومعاهم محمد عواد عشان يبقوا موجود كحراس في مباريات بوركينا فاسو وغينيا بيساو في تصفيات كأس العالم 2026.

طارق سليمان نجم الأهلي السابق قال: “تألق مصطفى شوبير وعودة محمد الشناوي، مكسب كبير للنادي الأهلي ومنتخب مصر. الشناوي أفضل حارس في مصر وأفريقيا.. ولازم الشناوي يشارك عشان نستفيد من خبراته الكبيرة على المستوى الدولي.. أنا اللي صعدت مصطفى شوبير للفريق الأول في الأهلي، وهو حارس واعد وهيكون مستقبل حراسة المرمى في مصر، لكن الفترة دي حقبة الشناوي سواء في الأهلي أو منتخب مصر”.