الان – أحمد شوبير بريء.. أسرة أحمد رفعت تكشف اسم المتورط الثاني في رحيل نجم مودرن – البوكس نيوز

لحد دلوقتي عارفين الطرف الأول اللي ظلم الكابتن أحمد رفعت الله يرحمه.. ادعوله بالمغفرة والرحمة.. وباقي الطرف التاني اللي الكل عايز يعرفه عشان يجيبوا حق نجم فريق فيوتشر.

والكلام كتير على الإعلامي أحمد شوبير.. لكن فوجئنا بالمحامي اللي كلفه النادي بيقول أن الشخص التاني اللي يقصده المرحوم أحمد هو عبدالظاهر السقا.. بس أخو أحمد رفعت طلع واتكلم وفجر مفاجآت.. أيه اللي حصل؟.. وليه شوبير بريء؟.. ومين الطرف التاني؟.. وليه أحمد دياب حضر العزاء؟.. ده اللي هنعرفه مع بعض في “عرب 22”.

المحامي محمد عثمان اللي كلفه فريق مودرن سبورت عشان يتابع قضية أحمد رفعت مع المؤسسة العسكرية عشان التجنيد طلع وقال: “الشخص التاني هو عبدالظاهر السقا مدير الكرة اللي كان معاهم في الرحلة.. ولو مش عايز يقوله لا كان قاله”.

إبراهيم فايق رد عليه وقاله: “بس عبدالظاهر السقا مش مسؤول في الدولة هو قال اثنين مسؤولين وهو مدير كرة”

المحامي رد وقال: “أحمد دياب وقت محاكمة أحمد رفعت العسكرية كان بيحاول يحل.. لكن بقيت قضية”.

بعدها عبدالظاهر السقا رد وقال: “أنا كمدير كرة مش شغلتي إني أجيب لاعب وأبيعه وأشتريه.. مدير الكرة بيكون بينفذ أوامر الإدارة واللاعب.. الباسبورد خده وكلنا كجهاز ولاعيبة سلمنا عليه وقولنا ليه ربنا يوفقك.. فيه فرق بين مسؤول في النادي ومسؤول في الدولة”.

ونفس الأمر طلع الكابتن نادر شوقي وكيل أحمد رفعت وكذب المحامي.. وقال عبدالظاهر السقا ملوش علاقة.. وأنا مش متأكد مين الطرف التاني.. ومقدرش أقول اسمه إلا إذا كنت متأكد 100%.

وكمان أخو المرحوم أحمد رفعت برضو طلعت مع الإعلامي إبراهيم فايق.. وكذب المحامي وقال: “كابتن عبدالظاهر السقا ملوش ذنب في أي حاجة، والاسم التاني محدش يعرفه غير أحمد الله يرحمه”.

“من ساعة ما أحمد توفاه الله إحنا عايشين في ضغط عصبي بسبب اللي بيطلع على السوشيال ميديا، أنا ذكرت اسم.. هو السبب في أذى نفسي لأحمد، والاسم ده اللي أخويا كان عايز يقوله لما كان معاك، لكن أنا مقولتش اكتر من كده..، بشكر الدولة، أنا عارف إن الناس مش هتقصر.. مفيش حاجة هتحصل هتعوض فراق أخويا”.

“إحنا عايزين بس إن مفيش لاعب تاني يتظلم ويحصله مشكلة وأذى بعد كده، أخويا مات قضاء الله وقدره.. هيثم عرابي ده أخونا، من بعد ما أحمد وقع يوم 11 مارس لحد النهاردة وهو عندنا كل يوم في البيت، أنا شايف إن هيثم مظلوم على السوشيال ميديا وهو ملوش ذنب”.

أحمد لما ذكر أسماء نادر شوقي وهيثم عرابي ودكتور أحمد أشرف، كان يقصد إن هما دول اللي عارفين إن هو كان تعبان لكن مش هما دول اللي عارفين مين الناس اللي أذته.. الشخص التاني اللي أحمد كان يقصده، أنا معرفوش، ولا حد يعرفه، أحمد بس اللي كان عارفه… أنا وأمي وأخويا الصغير تعبنا، إحنا المفروض ناخد عزا أخويا، إحنا يوميا في مكالمات كتير بتجيلي، إحنا يا جماعة معندناش حاجة وعايزين نعيش في سلام.

الإعلامي أحمد شوبير رد على الكلام اللي اتقال أنه الشخص التاني اللي كان يقصده أحمد رفعت: “أول حلقة ليا بعد وفاة المرحوم أحمد رفعت، ربنا يرحمه، أنا لسه راجع من العزا، وكان مظاهرة في حبه، اللاعب الخلوق الطيب المؤدب جدا، محدش شاف منه إلا كل خير واحترام، عزائنا لأسرته ومحبيه”.

الشاشة ملك للمشاهد.. عندك قضاء ومباحث إنترنت لو شعرت بالظلم وإن الناس جاية عليك.. اتحرك وروحلهم، هو ده الأسلوب الصح متدخلش نفسك في متاهات.

أحمد دياب رئيس رابطة الأندية وفيوتشر السابق حضر عزاء الراحل وده اللي أغضب الجماهير اللي شايفه أن السبب في الأذى النفسي اللي حصل لأحمد.