الان – التاريخ الأسود لـ أحمد شوبير في الأهلي ومنتخب مصر – البوكس نيوز

أحمد شوبير فاكر نفسه هو الحاكم بأمره في الكرة ومش هامه حد.. شغلته الوحيدة في الإعلام خدمة أهدافه.. ومحدش سلم من لسانه سواء لعيبة الكرة أو الصحفيين أو الإعلاميين.. بيطلع لسانه للكل.

وديما بيعمل المشاكل ويستغل حب جماهير الأهلي ليه.. وده اللي بيعمل خلافات بين جماهير القطبين.. وفي أي مشكلة بيعملها بيشغل لجانه الإلكترونية ضدهم.. وبيهاجموا خصومه على فيسبوك.. مين هم ضحايا أحمد شوبير؟.. وأيه مصير ابنه مصطفى في الأهلي؟.. وعمل ثروة قد أيه؟.. ده اللي هنعرفه مع بعض في “عرب 22”.

آخر أزمة عملها أحمد شوبير كلامه بعد أزمة اللاعبة شهد سعيد اللي ضرب زميلتها جنة عليوة وراحت الأولمبياد مكانها لما قال: “الناس على السوشيال ميديا كالعادة عملوا بوليكة وخلاص، وأنتوا مالكم؟ هو أنتوا أصحاب القرار؟.. اسم شهد اتسجل في المشاركين خلاص، هو أنت لما تكتب عليّ في السوشيال هتخوفني ولا إيه؟ أنت ولا تفرق معايا”.

وبعدها هاجم الجماهير والإعلاميين إبراهيم فايق وهاني حتحوت وإبراهيم عبدالجواد وقال: “كده حلو ولا عايزين تعملون فيلم؟.. إحنا في اليومين بتوع الأفلام، واللقطة والتريند، والشهد والدموع، حتى الحزن مش بنعرف نحزنه صح، لما يكون في حزن أو حالة ألم مش عارفين نتعايش معها صح.. الأفورة بتبان وبعد وقت المشاهد كلها بتتعرف”.

ضحايا حارس الأهلي السابق أحمد شوبير كتير ومنقدرش نعدهم.. لكن ممكن نتفكر منهم لعيبة زي الراحل أحمد رفعت.. وأحمد الميرغني نجم الزمالك.. ورمضان صبحي لاعب بيراميدز، ومحمد الشناوي حارس الأهلي ومحمد أبو جبل اللي منعه من الانتقال للأهلي عشان ابنه، والمعلق أحمد الطيب والمعلق بلال علام ده غير الصحفيين والإعلاميين الصغيرين في السن وغيرهم كتير.

لكن كل الناس بتسأل على مصير ابنه الحارس مصطفى شوبير في الأهلي هيكون عامل إزي خصوصا أن أبوه اللي بيحميه في الإعلام.. مشي من الشركة المتحدة اللي قالت ليه: “كفاية فوضى”.

مصطفى شوبير حارس شاب متميز قدر يدافع عن عرين الأهلي في وقت صعب بعد إصابة محمد الشناوي لكن أبوه كان ليه دور كبير في وجود مع الفريق خصوصا بعد ما منع النادي الأهلي من التعاقد مع محمد أبو جبل عشان ابنه.

بس بعد الفرصة اللي خدها قدر يخطف الأنظار وقدمت أندية سعودية عروض مغرية للاعب خصوصا أنه صغير في السن.. لكن السويسري مارسيل كولر المدير الفني للفريق رفض بشكل قاطع رحيل مصطفى شوبير وتمسك ببقاءه داخل الفريق.

كولر بلغ اللاعب أنه معجب بالمستوى اللي ظهر بيه مصطفى شوبير مع الفريق، وأنه هيكون الحارس الأساسي في حالة وافقت الإدارة على رحيل محمد الشناوي اللي شايف أن الحارس الشاب مستفيد من نفوذ أبوه في الأهلي وعشان كدا عايز يطلع يحترف في السعودية بعد العروض المغرية اللي وصلت ليه.. لكن الكابتن محمود الخطيب رئيس الأهلي متمسك بوجود الحارسين وعايزهم يكملوا في الفريق.

شوبير قبل كدا ورط مصر واتحاد الكرة في عقوبة كبيرة سنة 2010 لما كان بيقدم برنامج “أحلى صباح” على إذاعة الشباب والرياضة، وصدر قرار بوقفه ومنعه من الظهور.. بسبب الشكوى اللي قدمها الاتحاد ضده بعد ما قال إن مسئول في الاتحاد خلى المشجعين يضربوا أتوبيس منتخب الجزائر.. والفيفا فرض عقوبة 100 ألف فرنك على مصر ونقل مباراتين للمنتخب المصري برة.

لكن شوبير من أزماته قدر يعمل ثروة كبيرة من عمله في مجال الإعلام.. ده غير أنه قدر يتعاون مع المستشار تركي آل الشيخ رئيس هيئة الترفيه السعودي.