الان – تفاصيل ستاد الأهلي الجديد بتكلفة 10 مليار جنيه: مفاجأة في مشروع القرن للجماهير – البوكس نيوز

مش بس ستاد عالمي وعليه النسر.. دي هتبقي مدينة رياضية متكاملة فيها فنادق خدمية ومستشفى ومتحف النادي.. وكمان مزار سياحى.. النهاردة نقدر نقول مبروك لكل أهلاوي على الاستاد الجديد.. الحلم بقي حقيقة.

النهاردة الأهلي بيحضر لحاجة عظيمة وهتعمل نقلة وقفزة في تاريخ القعلة الحمراء.. أيه حكاية الاستاد الجديد؟.. وأيه المفاجأة اللي بيجهزها الخطيب لعشاق النادي الأهلي؟.. ده اللي هنعرفه مع بعض في “عرب 22”.

مشروع ستاد الأهلي هو الشيء الوحيد اللي ناقص الأهلي كمؤسسة رياضية متكاملة.. بطولات بيحققها ومنافسه الوحيد هو ريال مدريد.. وباقي الاستاد اللي هيبدأ يشوف النور بداية من 4 يونيو 2024.. عشان يعمل اللي محدش عمله في أندية أفريقيا.

الكابتن محمود الخطيب رئيس النادي الأهلي جهز مشروع القرن ومش قايل على تفاصيله لأعضاء مجلس الإدارة عشان ميحصلش تسريب لوسائل الإعلام.. وعايز يكشف بنفسه كل التفاصيل.

ستاد الأهلي حلم قديم وديما كان بيتردد قبل كل انتخابات.. يعني اتقال عليه وقت انتخابات المهندس محمود طاهر والخطيب.. ومفيش حاجة حصلت.. بس اللي خلى الموضوع جد هو أنه مفيش انتخابات الأيام دي.. والخطيب عايز يعمل يحقق الحلم قبل ما يمشي.. عشان يبقي عمل كل حاجة في تاريخه للأهلي.. سواء لاعب أو رئيس للنادي.

ستاد الأهلي هيكون تحت عنوان “مشروع القرن” للنادي الاهلي تحت رعاية وتنفيذ شركة “القلعة الحمراء” واللي بيمثلها محمد كامل بصفته الرئيس التنفيذي ورئيس مجلس الإدارة.

المشروع مش مجرد ستاد بس.. ده هيكون مدينة رياضية متكاملة فيها (فندق ومدرسة وجامعة ومستشفى ومتحف).. وهيبقي في مدينة الشيخ زايد وسعته 42 ألف متفرج.. والمدرجات هتبقي وراء المرميين والجماهير هتقف ومش هيبقي فيه كراسي.. زي ملاعب الأندية الخاصة في أوروبا بروسيا دورتموند وبايرن ميونيخ.

التحالف اللي هيبني الاستاد بيتكون من 16 شركة كبيرة.. وشركة “هيلتون” الشهيرة هي المسؤولة عن الإدارة الفندقية في المشروع.

والتصور الجديد اشتغلوا عليه لمدة سنتين وهيكون على مساحة مساحة 12 فدان وفيه منشأت على مساحة 80 فدان.. وتكلفته هتوصل لـ10 مليار جنيه.

الإعلامي محمد الليثي المقرب من مجلس إدارة النادي الأهلي قال: إن محمود الخطيب.. هيقول كلمة في حفل أسطوري هيكشف فيه دور مجلس الإدارة في تنفيذ مشروع القرن ودور الشركات المُساهمة واللي حصل الفترة اللي فاتت.

المشروع هيتنفذ على مرحلتين.. وأعمال الحفر في الاستاد هتبدأ يوم الأربعاء 5 يونيو.. وهينفذه 3 شركات على مدار 5 سنين.. وهيكون فيه مشروعات تانية غير الاستاد منها مدرسة الأهلي الدولية للغات وجامعة الأهلي الخاصة ومول تجاري عالمي.

وأكتر حاجة مهمة في المشروع هي مستشفي الطب الرياضي.. ودي هتوفر على الأهلي فلوس علاج اللعيبة وكمان هتبقي مشروع استثماري.

ستاد الأهلي هيتعاون فيه شركات محلية وإقليمية ودولية وهيكون تحت اسم شركة القلعة الحمراء.. ومدينة الأهلي الرياضية هتديرها شركة متخصصة وكبيرة وعالمية في المجال ده.. وهتتحمل مسؤولية إدارة الإنشاءات زي مشروع كامب نو التابع لنادي برشلونة.

واحدة من أكبر الشركات الهندسية في أفريقيا هي اللي تولت ملف إعداد تصميم خاص لمدينة الأهلي الرياضية.. وهتبدأ 3 شركات منها واحدة إماراتية في عملية الإنشاء والبناء.

وبتضم المدينة مستشفى رياضي هيشغله مركز طبي متخصص وعنده خبر أكتر من 35 عامًا.