الان – تقييم ومقارنة تاريخية بين صفقات الأهلي والزمالك الصيفية – البوكس نيوز

تحليل رقمي| الفيراري VS الصخرة.. مين اللي هيجيب السوبر الأفريقي؟.. تقييم ومقارنة تاريخية بين صفقات الأهلي والزمالك الصيفية.. وأيه مفاجأة جوميز لكولر؟

تارجت الميركاتو الصيفي للأهلي والزمالك كان ماتش السوبر الأفريقي يوم 27 سبتمبر 2024.. وده اللي الناديين جريوا عشان يخلصوا الصفقات بدري ويقدروا يشاركوا في البطولة الأهم في الموسم.. والأهلي قدر يجيب صفقات سوبر واتعاقد مع لعيبة في الخط الخلفي اللي بيعاني من أزمة.. لكن في المقابل الزمالك ضم لعيبة في الخطين الخلفي والأمامي.

ونقدر نقول الزمالك جاب الفيراري والأهلي ضم الصخرة.. مين هيكون ليه الغلبة في الموسم الجديد.. والسوبر الأفريقي؟.. ومين اللي عمل أفضل ميركاتو الأهلي ولا الزمالك؟.. ده اللي هنعرفه مع بعض في “عرب 22”.

الكابتن محمود الخطيب والمسئولين في الأهلي قدروا يعملوا ميركاتو قوي واتعاقدوا مع 4 لعيبة قبل ماتش السوبر الافريقي ودي تعتبر أبرز الصفقات في الموسم وهما عمر الساعي ويحيي عطية الله وأشرف داري، ويوسف أيمن.

وفي المقابل الكابتن حسين لبيب والمسئولين في الزمالك ضموا 5 صفقات أولهم المغربي محمود بنتايك، والفلسطيني عمر فرج، ومحمد حمدي لاعب إنبي والسنغالي الشاب سيدي ندياي والبولندي كونراد ميشالاك.. وده بعد ما استغل فترة مد القيد الأفريقي الخاصة بالسوبر الأفريقي وعمل تدعيمات قوية هتشكل إضافة للفريق في الموسم الجديد.

لكن أول وأهم مباراة هتلعبها الصفقات الجديدة هي بطولة كأس السوبر الأفريقي في السعودية ودي اللي هتفتتح الموسم.. وأكيد الصفقات الجديدة هيكون ليها دور وهترجح كفة فريق من الاتنين.. خصوصا الزمالك اللي بيدور على بطولة بعد كم المشاكل والأزمات اللي بيعاني منها.. وكمان الأهلي اللي عايز يأكد تفوقه ويبدأ موسم ذهبي.

خيارات الأهلي في الميركاتو الصيفي ركزت على المراكز المفقودة وبدأت بضم المصري القطري يوسف أيمن من الدحيل القطري في مركز قلب الدفاع.. واللاعب صاحب الـ 25 عاما بيمتلك قوة بدنية وخبرات مميزة بخوضه 97 مباراة سجل فيها 6 أهداف وصنع هدفين آخرين.. وحصل على 26 كارت أصفر وبطاقة حمراء وحيدة.

ومن الممكن يكون بديل في ماتش السوبر في حالة جاهزية الثلاثي أشرف داري ورامي ربيعة وياسر إبراهيم.

لكن النجم المغربي أشرف داري اللي قدم نفسه للجماهير العربية بشكل مميز في تجربته مع الوداد ده غير المشاركات الدولية ليه رفقة منتخب المغرب.. هيكون لاعب أساسي في المباراة خصوصا أنه جاي عشان يعوض محمد عبدالمنعم المحترف في فرنسا بشكل مباشر.

اللاعب اللي جماهير الأهلي بتعول عليه وهيكون إضافة للفريق وقادر يعوض غياب معشوق الجماهير علي معلول هو يحيي عطية الله الصفقة اللي أرهقت إدارة الأهلي بشكل كبير خصوصا بعد تمسك ناديه سوتشي بالحصول على أكبر عائد من بيعه.

عطية الله يعتبر من أفضل اللاعبين في مركز الظهير الأيسر في الكرة العربية وكان ضمن قائمة منتخب المغرب اللي حققت إنجاز نصف نهائي كأس العالم 2022 في قطر.

اللاعب الخامس هو عمر الساعي نجم الإسماعيلي لكن ده متوقع أنه هيكون برضو ليه دور مع إمام عاشور ومروان عطية.

وفي المقابل الزمالك عمل 5 صفقات هتكون إضافة قوية للفريق خصوصا بعد التعاقد مع الفيراري نجم فريق أحد السعودي البولندي كونراد ميشالاك اللي الكل متوقع ليه نجاح كبير مع الزمالك عشان هو لاعب سريع.

الزمالك عمل تدعيم قوي لمركز الظهير الأيسر اللي كان على رأس أولويات القلعة البيضاء في ظل الأزمة التي بيعانيها أحمد فتوح… وتعاقد مع المغربي محمود بنتايك لاعب سانت إيتيان وصاحب الـ24 عاما واللي بيمتلك مسيرة احترافية جيدة.. وشارك مع ناديه الفرنسي في 20 مباراة وساهم في هدفين.

وكمان ضم معاه محمد حمدي نجم فريق إنبي واللي بيجيد اللعب في الجهة اليسرى كظهير وجناح.

وفي مركز المهاجم ضم الدولي الفلسطيني عمر فرج مهاجم أيك السويدي ويعتبر من أبرز صفقات الصيف في الزمالك.. ومعاه نجم السنغال سيدي ندياي لاعب جيدياوايي اللي اتقيد تحت السن.