الان – خسائر بالملايين.. مسئول أهلاوي يفجر مفاجأة عن مستقبل الأهلي والزمالك – البوكس نيوز

بشكل رسمي الزمالك انسحب من ماتش القمة قدام الأهلي.. وقال إن الظروف القهرية منعته من لعب الماتش.. لكن موقف الأهلي هيكون أيه من اللي هيحصل للزمالك؟.. وإزي حسين لبيب اتصدم من موقف المسئولين في الدولة؟

وأيه رد فعل الكابتن محمود الخطيب؟.. وليه مسئول في النادي الأهلي قال إن الزمالك مش هيهبط درجة تانية؟.. ده اللي هنعرفه مع بعض في “عرب 22″.

يوم الإتنين 24 يونيو الزمالك فاجئ الكل وعمل اللي مش متوقع منه وقرر ينفذ تهديده ويعتذر فعلا عن ماتش الأهلي في قمة الدوري المصري بعد اجتماع ثلاثي جمع الكابتن حسين لبيب رئيس الزمالك وأحمد دياب رئيس رابطة الأندية المحترفة ووزير الرياضة أشرف صبحي.

في الاجتماع كان هيحصل انفراجة في الأزمة والكابتن حسين لبيب بلغ فريق الكورة يستعد عشان يدخل معسكر مغلق لكن بعدها حصل اجتماع في منزل حسين لبيب عشان يناقشوا الأزمة وفي الاخر رفضوا لعب الماتش وطلعوا بيان وقالوا إن ظروف قهرية هتمنع الفريق من اللعب.

لكن القرار ده سبب خسائر كبيرة جدا هيتحملها النادي الأهلي زي تكاليف الحكام الأجانب اللي دفع مرتبهم ومش هيحكموا الماتش والمبلغ بيوصل لـ70 ألف دولار وده رقم كبير هتتحمله خزينة النادي الأهلي وفي الاخر الحكام هيروحوا يتفسحوا في الأهرامات ويرجعوا على بلدهم.

الإعلامي الأهلاوي أمير هشام قال إن فيه خسائر ضخمة للشركات الراعية للمباراة والدوري المصري: والخسائر بتتراوح بين 90 لـ100 مليون جنيه.. وفيه حالة غضب بعد قرار مجلس الزمالك بالانسحاب”.

الشركات الراعية في الدوري بتدرس أنها تحمل الزمالك التكاليف دي أو جزء منها ده غير غضب رابطة الأندية من القرار اللي خده الزمالك.

واللي بعدها بعتت خطاب للنادي الأهلي قالت فيه إن الزمالك اعتذر عن الماتش وكدا فريقكم يعتبر فايز 2- صفر.

وكمان بعتت خطاب للزمالك واللي قررت فيه أنه توقع غرامة مالية على نادي الزمالك هيحددها مجلس إدارة الرابطة.. واعتبار الزمالك مهزوم أمام الأهلي بنتيجة (2-0).. وخصم 3 نقاط من رصيد الزمالك بخلاف المباراة اللي يعتبر فيها مهزومًا وهيتعاد ترتيب الفريق ضمن جدول المسابقة.. وهيعاقبوا كل اللي ليه صلة بقرار الانسحاب.

لكن إبراهيم المنيسي رئيس مجلة الأهلي والمسئول الإعلامي في النادي اتكلم عن تطبيق العقوبة على الزمالك وأنه مهدد بالهبوط للدرجة الرابعة حسب اللوائح وقال: “محدش يقدر ينزّل الزمالك من الدوري المصري ومحدش هيسمح بده.. واتحاد الكرة في عز قوته مقدرش ينزّل النادي الأوليمبي الدرجة الأقل”.

المنيسي قال: “الزمالك هيلعب ماتش الدوري الجاي، هي المشكلة كلها في قصة كرة أحمد سيد زيزو والعارضة بس.. إنما هيكمل باقي المباريات، هو شاف أن عنده نواقص في الفريق قبل مباراة الأهلي فـ قرر الإنسحاب”.

لكن مصادر في وزارة الرياضة قالت إن وزير الرياضة ضغط على حسين لبيب عشان يلعب القمة ولما رفض.. قاله لازم تقولنا دلوقتي هتلعبوا ولا لأ.. عشان شكلنا ميبقاش وحش زي ما حصل في مباراة الدوري سنة 2019 واللي الزمالك مرضيش يلعبها في وقت مرتضى منصور رئيس الزمالك السابق.

الزمالك هيرجع يلعب لو اتحقق الشروط والطلبات اللي هو عايزها.. لكن رابطة الأندية عرضت عليه.. لعب المباراة مقابل رحيل عامر حسين رئيس لجنة المسابقات وبيريرا رئيس لجنة الحكام.. لكن الزمالك رفض وقال المشكلة مع المنظومة مش أشخاص.

وكمان الزمالك منسحبش.. وإنما اعتذر والأهلي مش طرف في المشكلة.. حظه بس إن المباراة جت معاه.. والزمالك هيصعد للمحكمة الرياضية لو الأزمة متحلتش.