الان – “زهقت ومش هكمل عقدي”.. جوهرة الأهلي يتمرد على الخطيب – البوكس نيوز

“أنا عايز أمشي.. مش معقول اللي بيعمله معايا كولر.. مش هكمل عقدي.. ومحدش ليه دعوة أروح فين”.. ده اللي قاله نجم النادي الأهلي الشاب اللي أعلن التمرد على إدارة النادي الأهلي والكابتن محمود الخطيب.

وطلب أنه يمشي في الصيف من غير ما يكمل عقده.. مين هو؟.. وليه عمل كدا؟.. وأيه رد فعل الخطيب؟.. وليه عضو الزمالك قاله تعال وهنعملك اللي عايزه؟.. ده اللي هنعرفه مع بعض في “قشة لفة بلس”.

مارسيل كولر المدير الفني للأهلي عامل غربلة في الفريق ومش عايز أكتر من نص الفريق وده اللي زعل عدد كبير من لعيبة الأهلي اللي مش عايزين يخرجوا في صفقات تبادلية وعايزين يروح الأندية اللي تعجبهم.

وده اللي بيحصل دلوقتي مع جوهرة النادي الأهلي ومنتخب تونس.. اللاعب الشاب محمد الضاوي كريسو اللي تردد أنباء عن شعوره بحالة من الغضب وخلاص قرب يرحل عن القلعة الحمراء ويفسخ تعاقده في فترة الانتقالات الصيفية.

كريستو عايز يفسخ تعاقده مع الفريق الأحمر عشان كولر تجاهله ومش بيلعبه في الماتشات ومركون وحتى مش بيدخل في قائمة المباريات رغم أنه بيتدرب بشكل كويس.. ومعندوش أي إصابات.. وسليم 100%.

مصدر مسؤول داخل النادي الأهلي، فجر مفاجأة مدوية من العيار الثقيل، عن رغبة محمد الضاوي كريستو في الرحيل عن القلعة الحمراء.. وقال إنه عايز يمشي الفترة دي ومش عايز يكمل عقده مع القلعة الحمراء.. وأبدى استياءه الشديد من اللي بيعمله معاه كولر، وطلب فسخ تعاقده.. والرحيل عن الأهلي وهيرجع من تاني للدوري التونسي”. وكمان بلغ وكيله برغبته وطلب منه يدور على عروض سواء في مصر أو تونس.

المصدر قال إن كولر مش عايز اللاعب معاه وطلب منهم يسوقوا اللاعب في الدوري المصري أو برة.. ويطلع إعارة عشان مش عايزه في الفريق السنة الجاية.. لكن اللاعب رفض الخروج على سبيل الإعارة وطلب أن هو اللي يحدد وجهته الموسم الجاي.. ويختار النادي اللي هيلعب ليه.

والمصادر قالت إن المسئولين في الأهلي طلبوا منه يطلع إعارة في الموسم الجديد أو يدخل في صفقات تبادلية مع اللعيبة اللي عايزين يجيبوهم السنة الجاية.. لكن اللاعب رفض بشكل مطلق الخروج من الأهلي على سبيل الإعارة عن طريق النادي.. وطلب الرحيل بشكل نهائي وياخد باقي مستحقاته المالية في عقده اللي مستمر مع النادي لمدة 3 سنين جاية كاملة.

الإعلامى أحمد شوبير المقرب من مجلس إدارة الأهلي اتكلم عن أزمة النجم التونسي وقال: “كريستو عنده أزمة فى الأهلى.. اللاعب معجبش كولر اللي طلب رحيله عن الفريق وقال مش عايزه.. وفي نفس الوقت إدارة الأهلى مقتنع باللاعب وإمكانياته خصوصا أن سنة صغير وممكن يتقيد تحت السن.. كريستو عايز يمشى وعايز الموسم يخلص على أحر من الجمر عشان يمشى لأنه بيتدرب بس ومش بيشارك فى المباريات ومتأقلمش مع الفريق”.

إدارة الأهلي هتحاول تقنع كريستو يوافق على الإعارة لأي فريق مصري.. وميفسخش عقده.. عشان الفلوس اللي دفعوها للنجم الساحلي التونسي اللي بتوصل لـ2 مليون دولار غير مرتبه سنتين من غير لعب والأهلي معرفش يستفيد منه.. والأهلي رافض يفرط في كريستو بشكل نهائي أو يدفعوا باقي المرتب لمدة 3 سنين ويسبوه يمشي.

وكمان بيحاولوا إقناع اللاعب بالرحيل لنادي زد مقابل دخوله في صفقة تبادلية مع مصطفى العش مدافع زد اللي هييجي مكان محمود متولي اللي هيمشي في الصيف.

المصادر أكدت أن إدارة الأهلي مش عايزة اللاعب يروح الزمالك وعشان كدا هيبعوه للترجي بأي سعر يقدمه.. لكن مسئول في الزمالك قال إن رجل أعمال عرض على اللاعب ييجي الزمالك وهياخد اللي عايزه.