الان – كوبري للزمالك!.. نجم الأهلي يهرب للدوري الروسي.. ويرفض مقترح الخطيب – البوكس نيوز

رفض اقتراح الكابتن محمود الخطيب.. وجاله عروض من الدوري المصري ومرضيش بيها.. عايز يروح الدوري الروسي.. عشان يهرب من جحيم مارسيل كولر اللي قاله مش هلعبك.. وملكش مكان معايا في الفريق السنة الجاية!.. مين اللاعب؟.. وهل اختيار اللعب في الدوري الروسي عشان يكون كوبري ويرجع الزمالك؟ ولا لأ.. ده اللي هنعرفه مع بعض في “قشة لفة بلس”.

المدير الفني للأهلي مارسيل كولر، حط خريطة التعاقدات للموسم الجديد.. وحدد مين اللعيبة اللي عايزها تكمل ومين اللي هيمشي.. ولحد دلوقتي استقر على الاستغناء عن 5 لاعيبة من الفريق الأول في نهاية الموسم.

ومصادر في النادي الأهلي قالت إن قائمة الراحلين في الصيف هتشمل حمزة علاء ومحمد الضاوي كريستو ومحمد مجدي أفشة والفرنسي أنتوني موديست وطاهر محمد طاهر.

واحد من النجوم اللي عاملين قلق في النادي هو طاهر محمد اللي متضايق جدا من استبعاده من التشكيل الأساسي للفريق وخرجه من الحسابات الفنية لكولر.

طاهر محمد طاهر اعترض بشكل واضح في أوضة اللبس على قرار استبعاده وطالب بضرورة حسم موقفه في الفترة الجاية هيمشي ولا هيكمل مع الفريق.

لكن مصادر قالت إن طاهر محمد طاهر، اتحرك ومش هيستني الأهلي يحسم موقفه.. وطلب من وكيله يجيب ليه عروض.. وفعلا قدم ليه عرضين واحد خليجي والتاني روسي وبيفاضل بينهم دلوقتي قبل ما يمشي بشكل رسمي.. لكن نجم الأهلي عايز يروح الدوري الروسي.

الإعلامي كريم رمزي قال إن طاهر محمد طاهر قرر يأجل العروض المحلية اللي وصلته لحد ما يعرف مستقبله مع الفريق.. وده بعد ما وصل ليه أكثر من عرض محلي للرحيل عن الأهلي.. ده غير اتصالات من بعض الأندية العربية.

ولحد دلوقتي مجالوش تأكيدات رسمية من النادي الأهلي برحيله عن الفريق.. بس كولر بلغ لجنة التخطيط أن هو مرحب برحيل طاهر في نهاية الموسم.

لكن أكتر العروض جدية هو العرض اللي وصله من نادي زد وعشان كدا الأهلي عرض عليه يروح إعارة أو بيع نهائي مقابل مدافع من نادي زد اللي الأهلي مهتم بيهم سواء مصطفى العش أو محمد إسماعيل.

طاهر محمد طاهر، مقدرش يثبت نفسه مع الفريق وكولر مش بيعتمد عليه وبيخرجه من قايمة الفريق في معظم المباريات.. وكان جاي عشان يكون بديل لرمضان صبحي نجم الأهلي وقتها اللي انتقل لنادي بيراميدز في صفقة عملت ضجة كبيرة ولسه تأثيرها مكمل لحد دلوقتي.

نجم الأهلي اتمنع من الظهور في التلفزيون بقرار من مدير الكرة في الأهلي خالد بيبو.. اللي رفض ظهوره في برنامج “الهدف” مع إبراهيم عبد الجواد على قناة أون تايم سبورتس 2.. وده حصل بعد أزمة تصريحات محمد مجدي أفشة اللي هاجم لعيبة الأهلي وكشف أسرار أوضة اللبس.

وبيبو قال على قرار المنع: “كنا في فترة إجازة ومن حق اللاعبين الاحتفال مع الجماهير وعلى القنوات الداعمة للنادي، لكن حاليا رجعنا للتدريبات والدوري.. بعض التصريحات خلتنا نقفل على نفسنا… ومش عايزين نبقي مادة إعلامية في القنوات”.

الأهلي كان قعد مع طاهر محمد طاهر قبل كدا وقرر أنه يجدد ليه لمدة 3 سنين عشان يخلص عقده مع القلعة الحمراء سنة 2028.. لكن مارسيل كولر غير رأيه في اللاعب وده اللي ضايقه.. وقال أنا مش عايز اقعد دكة في الأهلي وعايز حقي وأشارك مع الفريق.

الكابتن محمود الخطيب عرض عليه يروح إعارة لأي فريق يختاره أو يبقي ضمن صفقات الأهلي اللي محتاجها في الصيف ويبقي على ذمة القلعة الحمراء لكن اللاعب رفض.. ومصصم يطلع نهائي.

وفيه كلام تداول انه رفض الانضمام للزمالك عشان جماهير الأهلي متزعلش لكن ده مش كلام أكيد لحد دلوقتي.. وكل شيء وارد في الكورة.