الان – نادي القرن ومجاملات الأهلي.. سيد عبدالحفيظ وعدلي القيعي يحرجان ميدو وأحمد عفيفي – البوكس نيوز

نادي القرن هتفضل خناقة الأهلاوية والزملكاوية اللي مش هتخلص لحد يوم القيامة.. وكل شوية حد بيتكلم عليها لكن الأيام اللي فاتت الإعلامي إبراهيم فايق جاب 4 شخصيات اتنين أهلاوية واتنين زملكاوية اتكلموا على 4 قضايا مثيرة للجدل في الفترة الأخيرة زي قضية نادي القرن.

وإزي الأهلي بيتجامل من الحكام واتحاد الكرة.. وأيه حقيقى مبادئ الأهلي؟.. ومين النادي الأكتر شعبية في مصر؟.. تعالوا نعرف أيه الحكاية في “عرب 22”.

في برنامج إبراهيم فايق على قناة MBC مصر الإعلامي إبراهيم فايق استضاف سيد عبدالحفيظ مدير الكرة السابق في الأهلي والمحلل الرياضي أحمد عفيفي المنتمي لنادي الزمالك في حلقة نارية اتكلم فيها عن قضية نادي القرن مين الأحق بيها الأهلي ولا الزمالك.

أحمد عفيفي قال: “جائزة نادي القرن مخدهاش اي فريق من اي اتحاد في العالم.. محصلش غير في افريقيا بس.. نادي الزمالك هو الأكتر حصدا للألقاب في القرن العشرين.. الزمالك كان بطل البطولة الاقوي والاهلي محققش نفس عدد البطولات.. إحنا ازاي بنتناقش اساسا

إجمالي بطولات الزمالك 9 والاهلي 7 بس مفيهاش خلاف ولا كلام كتير.. ومعايير اختيار نادي القرن محصلتش دي عملها مصطفى مراد فهمي سكرتير الاتحاد الأفريقي وعضو مجلس إدارة الأهلي.

رد عليه الكابتن سيد عبدالحفيظ وقاله: “نادي القرن لحد وقتنا هي عبارة عن تصنيف معايير.. شوية معايير تقتنع بيها أو لا براحتك.. المعايير بتقول إن في نقاط عشان يتاخد بطل معين والحسبة بسيطة.. النقاط اللي الأهلي حصل عليها منحته النقاط”.

“لو الأهلي اتعامله حاجة عشان ياخد نادي القرن ففي سنة 1994 اللي اتحط فيها المعايير.. الأهلي كان بيلاعب الزمالك في السوبر الأفريقي ولو عندي كل القوة دي في الاتحاد الأفريقي كنت كسبت.. لكن الزمالك هو اللي انتصر”.

الزمالك بيقول الـ9 أكبر من الـ7، طيب كأس العالم للأندية دلوقتي منهم صن داونز ومخدش غير بطولة واحدة وبرضو الوداد.. ليه معترض الزمالك.

وده نفس اللي أكده عدلي القيعي رئيس شركة الأهلي لما ميدو قاله: “الزمالك اتظلم في ملف نادي القرن واللوائح اتفصلت على مقاس الأهلي”.. القيعي رد وقال: “الأهلي متجاملش في لقب نادي القرن، وخده عن جدارة واستحقاق.. لو كنا نعرف أن الجدل ده هيحصل مكناش اعتذرنا عن المشاركة في البطولات الإفريقية.. وسبنا الزمالك يلعب”.

مش بس نادي القرن اللي سيد عبدالحفيظ أحرج فيه أحمد عفيفي.. كمان تظبيط المباريات والحكام.. عفيفي قال: “الأهلى بيكسب بمجاملات التحكيم”.. فرد عليه سيد عبدالحفيظ وقاله: “بس انت بقالك ربع قرن مكسبتش أفريقيا رغم انك بتلعب كل ماتشاتك بحكام اجانب.. وعمرك ما كسبتنى فى أفريقيا رغم كل ماتشاتنا بحكام أجانب.

وآخر ٢٠ سنة مكسبتش الأهلى فى الدورى بحكام أجانب إلا مرتين والماتشين كانو تحصيل حاصل وبنلعب فيهم بالبدلاء.

سيد كمل كلامه وقال:” أنا كـ أهلي بشتغل على نفسي لكن انت كـزمالك مش شايف غيرى، احنا اتقابلنا في إفريقيا 9 مباريات احنا فوزنا 6 مباريات بنفس المعطيات والأشخاص.. فين المجاملات”.

“جهاد جريشة بيحاول يكفر عن الذنب اللى عمله في ماتش المقاصة قدام الزمالك لغاية دلوقتي.. والعرجون ظلم الأهلي في نهائي إفريقيا في موسم 2007 لكنه عوض في السنة التانية وخلصت الصفحة”.

الحكام بتتسب في كوارث تحكيمية في مباريات الأهلي وتظهر في المباريات من تاني.

أحمد عفيفي رد عليه وقال: “مقدرتش أقول ان الأهلي بيستبعد الحكام.. لكن لو غضب جمهور الأهلي من حكم.. الأشياء بتتغير وشفنا ده مع الحكام شريف رشوان وأحمد حمدي.

فلو الحكم أغضب الأهلي بيتعرض لتهديد شديد.. لكن جهاد جريشة بعد اللي في الزمالك.. أدار 15 مباراة كان أحد أطرافها الزمالك أو الأهلي”.

الأهلي لازم يكون جامد لأن لو حد زعل الأهلي مسيرته هتنتهي عشان هو النادي الأكتر شعبية في مصر.