الان – وكيل بن شرقي يسهل الصفقة.. 4 صفقات سوبر في الأهلي – البوكس نيوز

ميركاتو الأهلي الصيفي بدأ من بدري.. وأمير توفيق مدير التعاقدات شبه خلص مع اللعيبة اللي عايزهم مارسيل كولر المدير الفني.

أهم اتنين بقوا قريبين جدا من الانتقال للنادي الأهلي أولهم الجزائري زين الدين بلعيد.. السرد باك وعنده 25 سنة يعني لسه صغير في السن.. ولعب 32 ماتش الموسم ده.. سجل فيهم 5 أهداف.

وشارك مع منتخب الجزائر في ماتش ولعب في بطولة أفريقا للمحليين 6 مباريات.. وخلاص باقي رتوش أخيرة على الصفقة بين الأهلي واللاعب.

اللاعب التاني وهو مدافع مصري ومعاه الجنسية القطرية يعني مزدوج الجنسية وميزته لو جه الأهلي مش هياخد مكان لاعب أجنبي واسمه يوسف أيمن وبيلعب في مركز قلب الدفاع والظهير الأيمن.. وبدأ حياته الكروية في أكاديمية أسباير القطرية، وانضم لفريق الدحيل سنة 2017.

والمفاوضات بين الأهلي واللاعب وصلت لأخرها وشبه اتحسمت الصفقة.. وهو عنده 25 سنة.. وشارك في 23 ماتش سجل هدفين وصنع هدف ولعب 7 ماتشات دولية مع منتخب قطر.

الصفقة التالتة هو النجم المغربي يحيى عطيه الله.. وده كبير شوية وعنده 29 سنة، لكن أول ما اتعرض على كولر وافق عليه وعجبه طريقة لعبه.

لكن المشكلة اللي بتواجه الأهلي حاليا هو وجود 2 وكلاء بيتكلموا باسمه.. منهم كريم البلق اللي كان وكيل نجم الزمالك السابق أشرف بن شرقي.. اللي بيحاول يحسم الصفقة للأهلي.. لكن ظهر وكيل تاني هو اللي عطلها لحد دلوقتي.

النجم الأبرز هو محمد كوناتي مهاجم نادي أخمات جروزني الروسي ونجم منتخب بوركينا فاسو.. اللي كولر كان عايزه من الشتاء اللي فات لكن أمير توفيق معرفش يحسم الصفقة دلوقتي.

محمد كوناتي كان مع منتخب بوركينا فاسو في القاهرة واتسأل عن انتقاله للأهلي.. فرض يرد على السؤال.. ودلوقتي وكيله جايب ليه عرض في الخليج.

لكن بالنسبة للعيبة الأجانب اللي هيبقوا موجودين مع الأهلي في الموسم الجاي هما علي معلول اللي الأهلي هيرفع اسمه من القايمة خصوصا في الدور الأول وهيبقي مش موجود عشان الإصابة اللي عنده.. واللي هيحسم القرار الدكتور.

وبعد ما يخف علي معلول هيقدر الأهلي يرجعه.. وهيجدد ليه العقد.. لكن هيتشطب في الدور الأول عشان مياخدش مكان في القائمة.

علي معلول مكمل في الأهلي لكن كولر عايز بديل لأن محمد شكري خلاص صفقته رجعت من جديد

لـ”سيراميكا كيلوباترا”.. ومفيش غير كريم الدبيس اللي كولر مش مقتنع بيه.. وغالبا هيكون البديل هو يحيي عطية الله.

اللاعب اللي هيمشي آخر الشهر هو المهاجم الفرنسي أنتوني مودست اللي خلاص رحلته خلصت مع الأهلي وهيبقي برة الفريق آخر يونيو عشان فترة الانتقالات الصيفية هتكون بدأت في كل الدوريات.

ولو جاله عرض هيمشي من الأهلي معندوش عروض يبقي هيكمل بالاتفاق مع كولر.

وبكدا يبقي الأجانب اللي هيكملوا مع الأهلي هما رضا سليم وبيرسي تاو وآليو ديانج لسه أمره مش محسوم وبين يمشي أو يقعد

لكن المشكلة هتكون أحمد القندوسي ومحمد الضاوي كريستو اللي بقى فوق السن.. واللي غالبا هيمشي عشان متأقلمش مع الفريق وكولر مش مقتنع بيه.