لا يمكن أعمل اغاني مهرجانات..وهذا رأيي فيما يحدث في جمعية الملحنين والمؤلفين (خاص)

تحدث “الفجر الفني” مع الشاعر أحمد علي موسى، حيث كشف في تصريح خاص لـ “الفجر الفني” عن رأيه في الأزمة الراهنة في جمعية الملحنين والمؤلفين، وأيضًا صرح لنا عن إمكانية تقديمه أغاني مهرجانات، وأزال الستار لنا عن ما تريده مصر في تطوير الفن في الفترة الحالية، وكشف لنا عن أعماله القادمة.

وأفصح عن رأيه فيما يحدث حاليًا في جمعية الملحنين والمؤلفين وكيف يحافظ على حقوقه قائلًا: “والله في قوانين بتحكم ده سواء قوانين جمعية الملحنين والمؤلفين المصريين وجمعية الملحنين والمؤلفين الدولية اللي هي إحنا منتسبين ليها”.

وتابع: “مع أن العقود الجديدة اللي موجودة دلوقتي في المصنفات الفنية المتاحة حاليًا بتسمح أننا نحافظ على كافة الحقوق على حسب الإتفاق ما بين الطرفين، لكن المشكلة كلها في العقود القديمة والاتفاقات القديمة اللي هي المفروض في القانون الجديد في منها حاجات اختلفت واتغيرت هي دي اللي عاملة الأزمة اللي موجودة حاليًا”.

وأضاف: “والأزمة دي موجودة على كل أغاني التراث مش تراث أم كلثوم فقط، لكن هي كل حاجة محددة ومقننة بس ساعات بيكون في شركات إنتاج بتستغل الموضوع ده وأنها تحجب عن الشخص كل حاجاته وكل مستحقاته ليه مش عارف بس تمام يعني”.

وعن إمكانية تقديمه أغاني المهرجانات صرح قائلًا: “لا مش ممكن اعمله مش تحقيرًا من النوع ده أو تقليلًا من شأنه والله بس هو مش نوعي أنا عارف ان الشاعر عامل زي الممثل المفروض يلبس اي جلابية بتتعرض عليه أو أي دور بيتعرض عليه في حاجات أنا محبش أنها تتحط في التاريخ بتاعي، كل واحد بيحب شكل معين أنا المهرجانات ده الشكل اللي مش بحب اسمعها هي طبعًا نوع له محبينه ومعجبينه وهو نوع من أنواع الفن بس انا مش من داعمينه يعني”.

وأفصح عن رأيه فيما تحتاجه مصر لتطوير الفن قائلًا: ” أول خطوة المفروض يعملها وزير الثقافة أنه بس مبدائيًا يشوف المصنفات الفنية اللي بدأت تبقي عائق قدام الفنانين المصريين مش عشان حاجة عشان عملية الروتين والتأخير والحاجات الكثيرة اللي بقي الفنانين المصريين ملزمين يعملوها وهما اصلًا مش ملزمين يعملوها”.

وتابع قائلًا: “في المقابل بتلاقي أغاني بتنزل على اليوتيوب وبتنجح وبتخاطب فئة معينة ولا بتعدي على مصنفات أو اي حاجة دي مشكلة كبيرة ومن أحد المشاكل، ومن أحد المشاكل الثانية أننا محتاجين ندعم المزيكا في مصر أكثر من كدة يا جماعة إحنا طول عمرنا كنا القبلة وكنا رقم واحد دائمًا مينفعش تتسحب مننا الريادة وتروح ناحية سوريا ولبنان أو أي ما كان الدولة، نسهل الأمور بس على الفنانين المصريين أكثر من كدة شوية”.

وكشف أعماله القادمة قائلًا: ” في 3 أغاني نزلوا مع رامي صبري وبحضر أغنية مع كريم محسن وفي تتر مسلسل في رمضان بس الحقيقة مش عارف اسم المسلسل لأنهم لسه مختاروش الاسم من ألحان محمد عبد المنعم وتوزيع خالد نبيل وغناء آدم”.