مراته خدت عياله وهربت.. صرخة أب على الهواء من أجل رؤية أبنائه.. ورد مفاجئ من الزوجة (فيديو)

«بعد 18 سنة زوجية.. استغلت عدم وجودي في المنزل، وأخذت ولادي وسابت البيت ومشيت».. بهذه الكلمات بدأ محمد الزوج الضحية، في رصد قصته المؤلمة بعد رفض زوجته له برؤية الأبناء مرة أخرى.

قال محمد: «كنت في الشغل، ولما رجعت البيت، لقيت مراتي واخدة كل حاجة في المنزل، حتى هدومي وأوراقي، والأولاد محمد وسلمى، ومشيت من البيت، وعندما ذهبت إلى منزل أسرتها، أكدوا لي أنهم لا يعلمون شيئًا عنها».

وأضاف الزوج خلال لقائه مع الإعلامية نهال طايل ببرنامج «تفاصيل» المذاع على قناة صدى البلد 2، «دورت على مراتي في كل حته واكتشفت إنها مأجرة شقة في العاشر من رمضان لما قابلتها هناك بالصدفة، ورفضت رؤيتي لأي من أبنائي حينها».

وتابع محمد: زوجتي رافضة إننا نرجع تاني، ومرة تقول إنها عايزة تربي العيال، ومرة أخرى تقول أنا عايزة الطلاق، ومبقتش عارف هيا عايزة ايه بالظبط، وبتقولي أنا مش هسيبك»، مضيفًا: «مرتبي كله بقى يتحول ليها بالكامل، وجت للجيران بعد ما أخدت العفش بتاعها، وطلبت منهم إنهم يشهدوا ضدي زور بإني كنت بضربها وأطردها من المنزل، ولكن الجيران رفضوا ذلك».

وأردف الزوج خلال حديثه: «سلمى بنتي كانت بتتصل عليا من تليفون صحابها، وتقول لي: بابا أنا عايزة أشوفك واحضنك وأقعد معاك، ولكني خايفة من ماما»، معقبًا: «ابني بقى عريس وعايز أشوفه، وأمه هيا اللي رافضة إنه يكلمني، لإنها مسيطرة عليهم وقايلالهم ميكلمونيش خالص».

وقال الزوج الضحية خلال قصته: «زوجتي كانت تفتعل المشاكل بين الحين والآخر، ففي مرة من المرات بعد عودتي من العمل، لم أجد لي أي ملابس في الدولاب الخاص بي، وعندما استشهدت بأحد من جيراني، نصحني أحدهم بشراء ملابس جديدة تجنبًا للمشاكل».

وبمواجهة الزوجة في مداخلة هاتفية على الهواء، ردّت على اتهامات زوجها لها قائلةً لـ الإعلامية نهال طايل: «انزلي الشارع واسألي كده هتعرفي مين اللي ظالم مين، ربنا يظلمه كده دنيا وآخره زي ما ظلمني أنا وولادي، مش هقول أكتر ولا أقل، ده أنا أمي ماتت بحصرتها عليها، وربنا ينتقم منه».